PRESS RELEASE
No.59/2024

SIAHA, 15 Thlazoh, 2024, Pobienoh – Siaha District Football Association (SDFA) pachhuapanohpa India Independence Day Football Tournament 2024 cha atanoh dawh 1:30 PM kha ta SDFA Playground, Meisatlâh, Siaha liata final match nata a khawna programme hmâpa châ ta, he daihti liata Puhpa T. Seido, Hon’ble EM, MADC cha khichhai laipa châpa ta programme a hmâkhei.

EM zachhihpa Puhpa T. Seido chata biereina daihti hmâh ta “Atakô Independence Day liata Trophy eima khaih theipa he, Abeipa vâ châ ta, India râh chhituh hmiatuapa a sie hapa Mahatma Gandhi, Pandit Jawaharlal Nehru, Subhas Chandra Bose, Bhagat Singh nata mohropa zy zana hlâpa ta âmo zy hriapasana vâta atanoh Programme a hmâh theipa eima châ” tahpa a reih.

“Athai penawhzy reizie ta cha, Adyuhna nata Sport lia zy heta National Flag zaw tyhpa châta, atanoh Trophy he cha, India Flag ry liata a Final awpa châ ei chi ta, mongia kawpa ta a khaih chyu awpa ta ei cha pasyu ei”

“12th Term MADC, Puhpa M. Laikaw, CEM chhihthana ry liata Thyutliapazy duasu he pachâ peimawh kaw ta, chavâta atanoh ta Field liata Motor sona awpa a tlôh khao lei pa he, JCB zy chhaota hmahla eimâ chhuah aw.”

“He Independence Day Football Tournament 2024 Football tournament he ta, sapa nata thlahpa liata byhnâ to hnawh châsala, kyhpachâna, adyryhna nata hmahsiena chhaichhi châta hmâ chyu awpa ta khokheina ei cha hlâ chyu ei” tahpa ta khokheina nata pasyunabie pha kawpa a reih.

Atanoh programme he Puhpa VT. Martin Vabeiduakhei, President, SDFA ta chhihtha ta, Artiste Rovina Khaimeichho ta hlasapa ta zawpi a palôpahawh.

Atakô Independence Day Football Tournament 2024 he Siaha United FC nata Meisavaih FC zy final angia ei ta, Siaha United FC zy ta 3-1 ta ama tlô.

ISSUED BY:
Information & Publicity Department
Mara Autonomous District Council
Siaha.