PRESS RELEASE
NO.41/2024
SIAHA, 12 Khihpa, 2024, Chutynoh – Atanoh dawh 11:00 AM kha ta 12th Term MADC asie ngâhaipa liata Chairman, Town Committee rao thiehpa Puhpa Nahlo Solo, MDC, 18-Siaha North-I biatuhpa cha â tyu nawpa Office chhôpadâh pahrâ pathao awpa ta Khazohpa lâ pavaosana thlahchhâna daihti a hmâh.
Rev. Jimmy F. Sachai, ECM College Vaih biatuhpa cha thlahchhâna ahneipatuh awpa ta hrua ta, Biesozy 8:14-16 nata Hlazy 37:3-5 reipapuana hnei ta, he khai tawhta Office chhôpadâh pavaosana nata Puhpa Nahlo Solo châta thlahchhâna a hnei.
He daihti liata ahlao thei hrapa Puhpa S. Lalremthanga, Dy. CEM ta biereina chyupa daihti hmâh ta, “12th Term MADC liata Member of District Council hry liata 07-Chakhei biatuhpa MDC nata EM i/c LR&S Department totuhpa Puhpa K. Hrahmo cha, Mizoram Legislative Assembly Genearal Election, 2023 liata 40-Palak(ST) A/C tawhta Member of Legislative Assembly châta atly patlohpa a châ vâta MDC nata EM a châna su parua ha ta, ano su pabie awpa ta 12th Term MADC liata post nano naopazy panano vaw byuh ta, chavâta atanoh chhao eima tuhpa he, he Post liata avaw tyuhpa a châ. Eima hry liata uhthei chaipa châ ta, kheihawh post lia rai â tyupa chhao ta ano he eimâ saohiah lymâ awpa châ ta, he sawhkhâ liata cha achaki liata lô peimawh kawpa a châ tah leithei’pa châ vei” tahpa a reih.
“Eima Missionary Revd. RA. Lorrain chhôhkha nah luh apabuna su Mararâh he byhnâ eima to lymâ; Khazohpa ta miah a patohpatiapa hmo he a y cheingei nahta eima hnabeiseih” tah ta, 12th Term MADC hmahlana asie haipa thokhazy reih ta, he ti nata râh châta tiama kawpa ta hria lymâ awpa nata Khazohpa hmotao theina angâhchhâpa ta keih chakâ lymâ awpa ta Puhpa Nahlo Solo hnoh ta khokheina bie hlâ ta, Puhpa S. Lalremthanga, Dy. CEM chata 18-Siaha North-I MDC Constituency ôna chhôh tawhta VC & nôpaw nata chhôhkha lâ tawhta he daihti a vaw hlao theipazy hnoh ta alynabie a reih.
Local Administration Department tawhta Head of Department Pihnô S. Lalmuanpuii, Sr. LAO chhao biereina chyupa daihti hmâh ta, Town Committee he Local Administration Department liata apangaihpa a châ tah ta, Town Committee ta a tao awpa hmozy nata hmahla awpa hmo thokhazy reina hnei ta, ama puhpa cha ama Department liata aly kawpa ta alypangiana nata khokheina bie a rei khai tawhta pavaosana daihti hmâpa he Zisu thlahchhâ reiparaohpa ta pachhâsapa a châ.
He daihti liata 18-Siaha North-I MDC Constituency ôna chhôh tawhta VC & nôpawzy hleikhô ta chhôhkha lâ tawhta amâ hlao thei hra.
Puhpa Nahlo Solo, 18-Siaha North-I biatuhpa he MADC GAD Notification No.A.16011/1/2023-GAD of 10th July, 2024 bie hawhta atanoh liata â tyu nawpa Office pahrâ awpa ta pavaosana a hneipa a châ.
ISSUED BY:
Information & Publicity Department
Mara Autonomous District Council
Siaha.
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.14-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.15-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.16-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.19-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.20-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.21-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.23-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.24-PM-450x300.jpeg)
![](https://www.madconline.com/wp-content/uploads/2024/07/WhatsApp-Image-2024-07-12-at-1.13.28-PM-450x300.jpeg)
You must be logged in to post a comment.