PRESS RELEASE
NO.56/2024

SIAHA, 13 Thlazoh, 2024, Hriaheinoh – Board of Mara Literature (BML), Mara Autonomous District Council (MADC) pachhuapanohpa ‘Mara Reih Nuhby Reihzie’ seminar, noh 1 chhôh hnei awpa cha atanoh dawh 11:00 AM kha ta E & F Conference Hall, MADC complex liata pathaopa châ ta, he liata Puhpa MH. Tiabi, Hon’ble Executive Member (EM) i/c School Education (M/S), BML etc. cha ‘Khichhai Laipa’ châpa ta programme a hmâkhei.

Chief Guest Puhpa MH. Tiabi ta biereina hnei ta, “Mara nah pi heta nuhby reina hnei pi ta, anodeikua cha, bie a chaneipa he hluh kaw ta, he he pahlaopahli (confusing) arainao kaw; pamosa nawpa ta nuhby hluh via pa rei nawpa lia ‘thy, thysy, thysâ, thythy…’ hmâpa châ ta, word repetition he hluh tu ha ta, a buabâ kaw ty. He he BML ta pachâ peimawh ta, he vâta atanoh seminar chhao he pachhuapanoh pa a châ.”

“Mongyuh nahzy nuhby reizie eima zamo khiala, a thlâzi kaw ta, reipa chhao confusing leipa ta, he hawh pa he ta Mara nah chhao heta za hnei thei sih la kho â chhi kaw” tahpa a reih.

Puhpa MH. Tiabi, BML Chairman chata ta “Mara nah eima rônah nawpa cha eimâ tobina chysia tlyma, pheiky tlyma châ leipa ta, Mara reih padyhphasa awpa he eima rônahna awpa cha a châ. Marasaw châthai penawhzy ta Mara reih he eima pasâhsa lei khia ahy hmah ta pasâhsa aw vei ei” tahpa reih ta, Marasaw zy ta Mara reih eima pasô awpa a peimawhzie a reih.

Chief Guest chata zawpi a hlao theipazy hnohta alyna bie reih ta, “nama rai peimawhpazy a pa tly ei chi ta, he daihti pachâ peimawh ei chi ta namâ vaw hlao theipa vâta BML Chairman ei châna lâ tawhta alyna bie ei cha reih ei” tahpa a reih hra.

Atanoh programme he Puhpa K. Beingiachhie, Sr. EO (M/S) nata Secretary, BML chhihthana ry liata ahmâpa châ ta, Rev. K. Laichhua Azyu, Moderator, ECM Assembly ta Khazohpa lâ daihti pavaosana hnei ta. Recorder châta Official tawhta Puhpa L. Beimokhai nata Puhpa L. Beiraduathie zy hmâpa châ ei ta. Hlasa thaipa Laihsa Rovina Khaimeichho ta zawpizy bie rei likah liata thai kawpa ta hla ta â ngie ei.

Seminar he session chhaih 2 lâ ta pachhaihpa châta, first session liata inaugural programme hmâpa châ ta, second session liata reipahmaohna daihti hmâpa a châ.

Puhpa FC Chhuasa, Member, BML cha resource person châpa ta seminar a hlaopazy ‘Mara reih nuhby reizie’ topic hmâpa ta presentation hnei ta, nuhby reizie proposal a ngiapa sâhrawleithôh (13) zy reipapuana a hnei pâ hra.

BML lâ tawhta zawpi zy reipahmaoh awpa ta a propose-pazy cha :

1. BML ta THY chô lâ reina mohchho/biesâ chyusia kawpa hnei awpa a khona he nâ pykhei theima? A chhâpa chhao ta.
2. Apyhkhei thei la, Mara reih ta ma na khoh via, transliterate?
3. Nuhby reizie hmâ haipa he châbu hluhpi nata Bible liata hmâ hapa cha tlôh ta, eima siesai/thy thei khao ‘ma?
4. Hmâ haipa nata a thiehpa (vaw y ha sa la) eima kho viapa lilaw tlâ eima hmâh pakaoh chy ma?

He seminar liata Mara nuhby reizie reipahmaohna liata bie chhâna taopa châ leipa ta, he tawhta reipahmaoh via laih heih awpa ta pathlupa a châ.

ISSUED BY:
Information & Publicity Department
Mara Autonomous District Council
Siaha.