Puhpa M. Laikaw, Hon’ble CEM ta MADC CEM hmiatuachaipa Puhpa Zakhu Hlychho ‘L’ thlâsu tly

Posted by on September 6, 2024

PRESS RELEASE
NO.69/2024

SIAHA, 6 Thlarâh, 2024, Chutynoh – Mara Autonomous District Council (MADC) Chief Executive Member hmiatua chaipa Puhpa Zakhu Hlychho ‘L’ ta eima ti nata râh châta â pie pasanazy my leipa ta, eimâ thei ngathlâhna palâsa nawpa ta Puhpa M. Laikaw, Hon’ble Chief Executive Member, Mara Autonomous District Council ta a thlâ yna su tlypa ta zana chôta pawpi sona a hnei.

Puhpa M. Laikaw, CEM zachhihpa chata, “He pawpi eima vaw sona chhâpa he daihti asie lymâ awpa liata Mara chi nata pho nata thyutliazy chhao ta eima leader hmiatuapazy khâ a thei thlâhnapa nata ama hriapasanazy Mara chi nata pho liata leidia leipa sala, atlâhta y si la, Abeipa Khazohpa ta daihti phapa miah pie sala, eima hmialâ (eima) sie lymâ nawpa lia chhao ta, he (Puhpa Zakhu Hlychho ‘L’) miah siesai hapa (a thina) atyheihna noh he District Council vyuhpa ta a thlâsu zy tly parie thlâh ha awpa he, atanoh liata ei palôhrupa châ ta. He he ta thyutlia hluhpizy chhao ta eima nôpaw hmiatuapa nah ama hriapasanazy, râh châta contribution ama tao hanapa zydua chhao he my leipa ta khâ athei ngâthlâh ha ei sala, (tahpa nata) zawpizy chhao he hawhpa palôhrupa he phaoh lymâ awpa chhao ta ei kho kaw” tahpa ta a thlâ yna su liata reina a hnei.

He khai tawhta Puhpa K. Vanlalliana, Executive Secretary, MADC ta thlahchhâna a hnei. Thlâ he ama Opipa dôhna chhôh, Siaha Vaihpi liata ypa a châ.
Thlâ yna su tlyna a hnei khai tawhta chhôhkha lâ tawhta ama pachhuapanohpa Thopi nata ahmie pahâh kawpa chhaota dona hneina liata Puhpa Pahnai Hlychho, (Puhpa Zakhu Hlychho pilâh unawhpa) nata Pihnô HC. Nakua, (Puhpa Zakhu Hlychho sietanô) zy ta alynabie reina nata biereina chyupa hnei ei ta, “he hawhta râh luhpa siapa, chyhsa pathlua pa-eihna hnei leipa, Puhpa M. Laikaw, Hon’ble Chief Executive Member eima hneipa he arônah tah pi ta, eimâ ly hmeiseih; chhôhkha vyuhpa ta alynabie eima reih” tahpa ta CEM zachhihpa nata a hrialâhpazy hnohta alynabie ama reih.

He daihti liata ary liata palâsapazy he ta CEM zachhihpa he ama chakaochahlâh:-

  1. Puhpa K. Vanlalliana, Executive Secretary
  2. Puhpa Pheiki Solo, Secretary to District Council
  3. Pihnô Nazee Khailah, Sr. Land Revenue & Settlement Officer
  4. Puhpa BeiRôkhu Beitâ, Information & Publicity Officer
  5. Puhpa John M. Beilaisei, PS to Chief Executive Member
  6. Puhpa Lalnunfela NK, PSO to CEM
  7. Puhpa Martin L. Hlychho, Cameraman, I&P Department

Puhpa Zakhu Hlychho ‘L’ he târi 15.12.1943 pa ta vaw pih ta, târi 06.09.2017 liata miah apahâsai ta, atanoh he â vaw pahâ tawhta kô 7 a tlohna noh a châ.

ISSUED BY:
Information & Publicity Department
Mara Autonomous District Council
Siaha.