PRESS RELEASE
NO.77/2024

SIAHA, 19 Thlarâh, 2024, Pobienoh – Atanoh dawh 1:00PM khata Puhpa M. Chiadung, Executive Member (i/c Soil & Water Conservation, Animal Husbandry & Veterinary), MADC ta a Official Chamber, MADC, Siaha liata Siata Quasquicentennial 2024 Theme Song & Centennial T-Shirt Release-na programme â hmâkhei ei.

Programme he Puhpa John VT. Hniehu, Chairman, SQCC ta chhihtha ta, Rev. KC. Thangching, Laty Biatuhpa ta Abeipa lâta pavaosana daihti â hmâh. Puhpa John Denese nata Laihsa Doveri ta Siata Quasquicentennial 2024 Theme Song pahnie kawpa ta sapa ta zawpi ama palôhpahawh.

Puhpa M. Chiadung, EM, MADC chata, “Abeipa ta hnatlâna miah pie ta, Siata Khih kô 125 (Siata Quasquicentennial 2024) a hmâh thei awpa ta Khazohpa ta eima hronazy miah pahlôh ta, atanoh Siata Quasquicentennial 2024 Theme Song & Centennial T-Shirt release thei awpa ta programme zy eimâ hmâh theipa he aly’pa a châ hmeiseih,” tahpa ta a reih.

“Râh hmahsie awpa heta achuna (education) he peimawh kaw ta, achuna papeimawhsa ta, achu pazao khoh kaw tlôh ta, sôh nah thih rairuna vâta admission la n’awpa a hnei leipa cha, a pahnosa ei sih la, eimâ baokhâ lymâ aw,” tahpa ta EM ta a reih.

“Hlazy 118:9 bie liata “Beimachâzy ngâpa hlâta, Abeipa a chhaipa a pha via,” a tahpa hawhta, tiama kawpa ta raihria ta, khihtlâh hmahsie awpa ta achuna (education) he eima pachâpeimawh chai awpa byuh ta, Khazohpa hmiapasah lymâna chôta tiama kawpa ta châ achu ta, achuhaipazy eima pasyu hluh via lymâ awpa he a peimawh ngaita kaw,” tahpa ta EM ta a reih.

Siata kô 125 atlohna alyna (celebration programme) (Siata Quasquicentennial 2024) he atakô November 29, 2024 he tlôpakinoh ta raopa a châ.

Puhpa M. Misael, Project Director, DRDO, Siaha, Puhpa J. Jeffrey Khara, Moonlight Editor nata Puhpa M. Mesaka, Siata-II VCP zy ta pasyunabie pha kawpa reina ama hnei.

Puhpa C. Lalchhanhima (Hnailung), Secretary, SQCC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.

ISSUED BY:
Information & Publicity Department
Mara Autonomous District Council
Siaha.