PRESS RELEASE
NO.48/2024

SIAHA, 24 Khihpa, 2024, Pakhynoh – Atanoh my dawh 10:30 AM kha ta MADC Session Hall liata târi 24-25 Khihpa, 2024, noh 2 chhôh atyupahmaoh awpa Mara Autonomous District Council (MADC) Monsoon Session, 2024 cha Puhpa N. Viakhu, Chairman, MADC chhihthana ry liata pathaopa a châ.

Daihti pathaona liata Chairman ta Khazohpa Biehrai Pathaihpa reina hnei ta, he khai tawhta atakô Monsoon Session pavaosana hnei awpa ta a raopa Puhpa L. Prisila, MDC, 05-Zyhno Constituency ta thlahchhâna a hnei.

Chairman ta Monsoon Session 2024 Panel of Chairman châta Puhpa Albert TT. Sachu, MDC, 07-Chakhei Constituency nata Puhpa TA. James Riatha, MDC, 24-Siaha West-I Constituency zy a rao ei.

Business reipathao hlâ ta a tliata liata miah a pahâsaipa Pihnô N. Gracy, MDC ‘L’ (thi noh 09.05.2024) nata Puhpa HC. Chhiesa, Ex-MDC ‘L’ (thi noh 10.07.2024) zy taokheina daihti hmâpa châ ta, Chairman ta ama thâtih tlâhpipa reina hnei ta, Puhpa M. Manasia, MDC, 19-Siaha North-II Constituency, Puhpa H. Malvina, MDC, 2-Phura Constituency, Puhpa MH. Tiabi, MDC, 5-Chhaolô Constituency nata Puhpa N. Zakhai, MDC, 14-Amôbyuh Constituency zy ta pasaileina nata taokheina bie ama reih.

Atliata liata 07-Chakhei Constituency tawhta Member atlypatloh thiehpa Puhpa Albert TT. Sachu, Executive Member thiehpa Puhpa M. Chiadung (8-Siata Constituency) nata Chairman, Town Committee thiehpa Puhpa Nahlo Solo (18-Siaha North-I Constituency) zy cha Chairman ta House liata alypangiana nata alykheina bie a reih.

Atakô Monsoon Session atyupahmaohpa liata Starred question (pakah ta chhy awpa) sâ 14 y ta, unstarred question (ropa ta achhy awpa) sâ 1 a y. Unstarred question-zy he member-zy atyuna dawkâh liata achhy chiehpa ta sopa châ ta, starred question sâ 14-pazy he atyupahmaoh daihti noh 2 chhôh liata hiahrina nata achhyna tao khai achhuahpa a châ.

Myrâh liata List of Business hawhta hiahrina nata achhyna daihti hmâpa châ ta, atanoh liata sâ 7 hiahrina nata achhyna hnei patlôpa a châ. Zâlâ liata Bills nata Rules zy introduce pa a châ; cha nahzy cha:-

Official Bills: –

1. The Mara Autonomous District Council (Town Committees or Councils) Bill, 2024

Official Rules: –

1. The Mara Autonomous District Council (Salaries, Allowances and Pension of Members) (Seventh Amendment) Rules, 2024
2. The Mara Autonomous District Council (Social Welfare Department Group ‘B’ Posts) Recruitment Rules, 2024

He Bills and Rules zy he mylâ târi 25.7.2024 atyupahmaoh pazao daihti liata pass achhuahpa a châ.

Atahmâ atyupahmaohna liata official resolution angiakheipa “Mizoram: The Scheduled Castes and Scheduled Tribes list (modification) order 1956 nata Act 81 of 1971 List No.8 liata LAKHER tahpa he MARA tahpa ta India sawhkhâ ta maniah thlapa mawh sy” tahpa cha atanoh liata apykheipa ta pass-pa a châ.

He Monsoon Session, noh 2 chhôh ô awpa he my dawh 10:30 AM tawhta 4:00 PM taihta hnei tyhpa châ aw ta, dawh 1:00 PM – 2:00 PM, dawhkha chhôh apahâna daihti châta hmâ awpa a châ.

ISSUED BY:
Information & Publicity Department
Mara Autonomous District Council
Siaha.